أصوات نيوز-سناء أرعباب
وانا أتابع أحداث الشغب التي تسبب فيها يافعين و شباب بالملاعب الرياضية مؤخرا , وما وقع من تجاوزات خطيرة لا علاقة لها بالرياضة ولا بالأخلاق مست الأشخاص والتجهيزات داخل الملاعب ومحيطها , وما عقب ذلك من اعتقالات وتحقيقات و محاكمات , وما نتج عن ذلك من مآسي عائلية وتحطيم أحلام وانهيار مشاريع مستقبلية في لحظات.
كل سنة نعيش حالات من العنف في الملاعب الرياضية , ويقرر منع تنقل الجمهور و تلعب المباريات بمدرجات فارغة , و الأخطر أنه في كل سنة يعتقل شباب في عمر الزهور والغريب أن لا أحد يتعظ بما يقع.
حان الوقت لإطلاق ناقوس خطر شغب الملاعب , وليتحمل الجميع مسؤوليته , الأسر التي لا تتابع تفاصيل حياة أبنائهم الشباب واليافعين وتتركهم فريسة سهلة للتأثر بالظواهر المجتمعية السلبية, وأيضا هي مسؤولية الألترات الكروية التي يفتقد معظمها للوازع الأخلاقي و الروح الرياضية وتشحن أعضائها وتدفعهم بشكل غير مباشر لارتكاب حماقات يعتقد الشاب و اليافع انه يدافع عن لون الفريق بينما هو يسيء لنفسه أولا وللفريق ثانيا.
تخيلت حالة أم يصلها خبر اعتقال ابنها المنتمي لإحدى الألتراتوتقديمه للمحاكمة بسبب طيشه وتهوره. كيف لهذه الأم المكلومة أن تجد الكلمات لتصف حزنها الكبير وألمها العميق؟ كيف لها أن تستفيق من هول الصدمة بما اقترفه ولدها مع رفاق السوء و كيف أصبح مصيره السجن ؟
لتبقى هذه الرسالة بالدارجة المغربية مجرد محاولة تقارب حجم الفاجعة ودرسا للجميع لوقف نزيف شغب الملاعب.
وبالليل خليت ليك عشاك و تسنيتك ترجع … وما رجعتيش
عيط ليك في التلفون وكنلقاه مقطوع
باك وخوك عيطو لكاع لصحابك
قالو لينا بلي تشديتي في التيران
مشيت كنجري وكنسول
قالو ليا قدموك للوكيل
علاش أولدي درتي فيا هاد الحالة ؟
شنو درت ليك حتى تخليني مجرجرة في المحاكم ؟
وعلى ود جلدة منفوخة بالريح ضيع حياتك في الحبس
وراوني الفيديوهات وتصدمت
ماشي ولدي هدا … هدا شي حد آخر
ولدي لي كنعرف ظريف و مأدب و مخلق
وهدا لي شفت … ما كنعرفوش
صدمتيني أولدي صدمة حياتي …
ياك لي طلبتيها كنوجدوها ليك أنا وباك ؟
وكنقطعوها من لحمنا باش ترتاح انت وخوتك
ياك أولدي ؟
على آخر يامي وليت كنوقف قدام المحكمة قبل ما تحل بيبانها
ونبدا نقلب على وجهك من ورا الزاج ديال السطافيطات ع الله نشوف وجهك
وكنتسنى موعد الجلسة وكنطلب الله يفرجها عليك
فين تربيتي ليك ؟؟؟
فين تمارة باك بالليل والنهار باش تقرا و تلبس و تاكل و تقرا ؟؟؟؟
كلشي مشا … كلشي ضاع
لي شافك يقول هدا ما رباوهش واليديه ؟
ولدوه وطلقوه للزنقة
ضربتي كلشي في الزيرو
واش حنا ناقصين ؟
مضاربين مع الحياة و تزيدنا هم على هم ؟
على قبل ماتش ديال الكورة ضيع حياتك وضيعنا معاك ؟
هوما سالاو الماتش ومشاو لديورهم عند ولادهم و عند واليديهم
وانت ؟ شنو ربحتي ؟
بناقص من هاد الكورة و هاد الفرقة لي تابعها
انت هرستي حياتك وهرستينا معاك
ما فكرتيش فيا ؟ في باك ؟ في خوتك ؟ وفراسك ؟
كنت كنحلم تكمل قرايتك ودير مستقبلك وتفرحني أنا وباك
كلشي مشا …
الخليفة ع الله.
كنتمنى القاضي يحن فيك ويحن فيا
وباش ما حكم عليك غتبقى ولدي
وغاندي ليك الكفة كل سيمانا
وغنبقى تابعاك حتى يطلق الله سراحك
وترجع لميمتك .
هدا جهدي عليك وهادشي لي قسمو علينا الله
غير كنتمنى هادي دير ليك العقل
ماشي غير ليك بوحدك
لكاع هادو لي تابعين الفراقي ديال الكورة بلا عقل .
الله يطلق سراحك اولدي.
